“Ազգային երգ ու պար” առարկայի դասագիրք-ժողովածուի ստեղծում

Ասել, թե սա ևս մեկ նախագծային աշխատանքի ամփոփում էր, նշանակում է չասել ոչինչ։ Սա ոչ միայն ամիսներ շարունակ ձգվող հետևողական և աննախադեպ նախագծային աշխատանքի հանձնում էր, այլև ազգային մշակույթի ու ոգու փառաբանման հավաքական տոն!!!

«Ազգային երգ ու պար» առարկայի ուսուցչուհի Աննա Թովմասյանի նախաձեռնած նախագծային աշխատանքի նպատակը և վերջնարդյունքն էր աշակերտների հետ միասին ստեղծել 5-ից 7-րդ դասարանների համար «Ազգային երգ ու պար» առարկայի դասագիրք-ժողովածու, քանի որ առարկան դասագիրք չունի։

Նախագծին էին միացել նաև ինֆորմատիկայի ուսուցչուհի Ք. Հովսեփյանը, ով 7-8-րդ դասարանների աշակերտների մի խմբի հետ թվայնացրել էր գիրքը, խմբագրել, էջադրել, ստեղծել QR կոդեր՝ երգերի հղումներով, ինչպես նաև 8բ դասարանի աշակերտ Նարեկ Կարապետյանը ստեղծել էր գրքի շապիկը։

Իսկ կերպարվեստի ուսուցիչներ Մ. Հայրապետյանի և Մ. Պետրոսյանի ղեկավարությամբ աշակերտների մյուս խումբը ստեղծել էր գրքում ներառված երգերի ու պարերի համար նկարազարդումներ և նկարներ։

Արդյունքում ստեղծվեց 127 էջից բաղկացած գիրք, որը ներառում է ոչ միայն երգերի տեքստեր, նոտաներ, պարերի մասին դասեր, թեմային ուղեկցող հարցեր, այլ նաև ներկայացնում է ազգային երգ ու պարի մեջ մեծ ավանդ ունեցող մշակութային գործիչներին և համույթներին։

Իրենց առջև դրված խնդիրը գերազանց կատարելուց հետո եկավ ահա այս պահը՝ հանդիսավոր կերպով հանձնելու այն դպրոցական համայնքի դատին։ Աննա Թովմասյանը, ով նաև «Ակունք» ազգագրական համույթի առաջատար սոլիստն է, խնդրին մոտեցավ ամենայն պատվախնդրությամբ՝ միջոցառմանը հրավիրելով նաև ազգային երգ ու պարի և այս առարկայի ակունքներում կանգնած և հայ երգի պահպանման ու տարածման մեջ մեծակշիռ ավանդ ունեցող պատվավոր հյուրերի՝

ՀՀ վաստակավոր արտիստ, երգիչ Արսեն Գրիգորյան՝ Մրո,

ՀՀ վաստակավոր և ժոովրդական արտիստ, ծիրանափողի վարպետ Գևորգ Դաբաղյան, Gevorg Dabaghyan

ՀՀ մշակույթի վաստակավոր գործիչ, «Կարին» ազգագրական երգի-պարի խմբի հիմնադիր-ղեկավար, պարագետ Գինոսյան Գագիկ

«Ակունք» ազգագրական համույթ AKUNQ Ethnographic Ensemble

Միջոցառմանն իրենց ներկայությամբ պատվել էին նաև Էրեբունի վարչական շրջանի ղեկավար Հակոբ Բալայանը և աշխատակազմը, ինչպես նաև` Էրեբունու Սուրբ Մեսրոպ եկեղեցու հոգևոր հովիվ Տեր Ղուկաս Բալայանը և այլ պատվավոր հյուրեր։

Եվ դահլիճը թնդաց 250 աշակերտի՝ միասին հնչեցրած ազգային երգի ու ձեռք ձեռքի տված պարի հզորությունից։ Ազգային ոգին էր թևածում դահլիճում՝ ստիպելով ներկաներին կանգնել ու միանալ ողջ դահլիճի երկայնքով պարային շարք բռնած աշակերտներին՝ միասնական զգալու հայի հավաքական ուժն ու ոգին

Աշակերտների կատարումների ավարտին արդեն բեմ բարձրացան մեր հյուրերը՝ իրենց հայրենաշունչ կատարումներով գրավելով ողջ դահլիճն ու փառաբանելով հայ երգն ու պարը։ Թնդում էր հայոց պարն ու միասնական ոգին!!!

Պարզապես անհնար է խոսքերով փոխանցել այն ողջ հոգեթով զգացողությունը, այն ոգևորությունը, որը 2 ժամ ու կես շարունակ տիրեց մեր դպրոցում՝ օրը վերածելով ազգային երգ ու պարի իրական տոնի

Սա նաև յուրահատուկ հաշվետվություն էր՝ ևս մեկ անգամ ապացուցելու այս առարկայի կարևորությունը դպրոցում, ներկայացնելու կատարվող հսկայածավալ աշխատանքն ու դրա բարդությունը և ահա այսպիսի արդյունքը, որին հնարավոր է հասնել միայն այն պարագայում, երբ առարկան դասավանդվում է ոլորտի լավագույն մասնագետներից մեկի կողմից

Շնորհավորում ենք ընկեր Թովմասյանին, ով անհավատալի ծավալի աշխատանք է կատարել, շնորհավորում ենք նախագծի մեջ ընդգրկված բոլոր 18 և միջոցառմանը մասնակից 250 աշակերտներին, ինչպես նաև՝ դպրոցի տնօրեն Նունե Մանուկյանին այս աննախադեպ միջոցառումը մեր դպրոցի պատմության մեջ գրանցելու կապակցությամբ։

Հոգաչափ շնորհակալ ենք միջոցառմանը ներկա մեր պատվավոր հյուրերին, որոնք իրենց ներկայությամբ և հրաշալի կատարումներով պատվեցին մեր միջոցառումը, գերեցին և ջերմացրին բոլոր ներկաների սրտերն իրենց հուզիչ ելույթներով։

Ինչպես նաև շնորհակալ ենք դպրոցի բոլոր աշխատակիցներին, ուսուցիչներին և դասղեկներին, որոնք նեցուկ եղան և նպաստեցին միջոցառման հաջող կայացմանը և որոնց նվիրական ջանքերի շնորհիվ հնարավոր եղավ այս ամենը ճիշտ կազմակերպել։

Շնորհավորում ենք բոլորիս!!!

ՄԵՆՔ ՈՒԺԵՂ ԵՆՔ ՄԻԱՍԻՆ!!!